Ayiti : CSCCA bay enstitisyon piblik yo jiska 31 oktòb pou remèt envantè byen Leta yo
Kou Siperyè Kont ak Kontansye Administratif (CSCCA) mande tout enstitisyon piblik nan peyi a pou yo soumèt envantè byen mèb ak byen imobilye yo genyen sou responsabilite yo, anvan dat 31 oktòb 2026 la. Nan yon avi prezidan enstitisyon an, Mèt Rogavil Boisguéné, siyen lendi 12 oktòb 2026 la, CSCCA fè konnen okenn depans piblik pa dwe jwenn otorizasyon ni peman si enstitisyon konsène a pa respekte egzijans sa a.
Desizyon sa a chita sou plizyè dispozisyon legal ki tabli règ pou jesyon byen ak resous Leta. Pami yo, gen atik 10 arete 16 fevriye 2005 la sou kontablite piblik, ansanm ak atik 5, alineya 11, dekrè 23 novanm 2005 la ki òganize fonksyònman CSCCA. Daprè dispozisyon sa yo, chak enstitisyon dwe prepare yon lis byen li posede epi voye l bay Ministè Ekonomi ak Finans (MEF), ki gen responsabilite pou transmèt dokiman an bay Kou Siperyè Kont la.
Nan menm avi a, CSCCA mete aksan sou atik 95 dekrè 30 septanm 2026 la, ki tabli bidjè jeneral Leta pou egzèsis fiskal 2026-2027 la. Atik sa a egzije enstitisyon administrasyon piblik yo deklare byen materyèl dirab yo, pandan y ap presize konbyen lajan Leta te depanse pou achte yo. Li entèdi tou kontwolè finansye ak kontab piblik yo bay otorizasyon oswa fè peman pou yon depans si enstitisyon ki konsène a poko depoze envantè li.
Rapèl sa a fèt pandan CSCCA ap konstate yon mank respè enpòtan pou obligasyon sa a nan administrasyon piblik la. Selon enfòmasyon Kou a kominike, pandan egzèsis fiskal 2024-2025 la, se sèlman 58 enstitisyon piblik ki te remèt envantè byen yo. Sitiyasyon sa a soulve kesyon sou fason enstitisyon Leta yo ap suiv, anrejistre ak jere patrimwàn piblik la, sitou nan yon kontèks kote transparans ak bon jan kontwòl sou itilizasyon resous Leta rete yon gwo defi.
Devan konsta sa a, CSCCA avèti li pral pran an konsiderasyon respè obligasyon sa a lè l ap egzamine demann odit enstitisyon piblik yo soumèt devan li. Sa vle di, yon enstitisyon ki pa depoze envantè li kapab rankontre obstak nan tretman dosye odit li. Avèk nouvo rapèl sa a, Kou Siperyè Kont la vle fòse administrasyon piblik yo pran plis responsabilite nan jesyon byen Leta yo, pandan dat limit 31 oktòb 2026 la ap pwoche.
