Gresye : Lapolis ak Task Fòs la lanse yon ofansiv kont bandi yo

Yon gwo operasyon sekirite lanse byen bonè mèkredi maten sa a nan komin Gresye, nan depatman Lwès, kote Polis Nasyonal d Ayiti (PNH), ansanm ak Task Fòs la, ap chèche reprann kontwòl sou plizyè zòn ki anba enfliyans gwoup ame. Dapre temwayaj kèk abitan, depi anviwon 4è40 nan maten, gwo kout zam, bri elikoptè ak eksplozyon ap fè moun nan plizyè lokalite nan komin nan viv anba gwo tansyon.

Nan kad operasyon sa a, plizyè inite espesyalize nan lapolis, tankou UTAG, UDMO ak SWAT Team, ta patisipe nan entèvansyon an. Dapre enfòmasyon ki disponib yo, fòs lòd yo itilize gaz lakrimojèn ak dròn kamikaz pou atake pozisyon bandi ame yo okipe. Entansite kout zam yo ak eksplozyon yo montre operasyon an ap dewoule nan yon kontèks konfwontasyon dirèk ant lapolis ak gwoup kriminèl yo. Sepandan, poko gen bilan ofisyèl ki disponib sou kantite viktim, arestasyon oswa dega operasyon an ta lakòz.

Nouvo entèvansyon sa a fèt nan yon moman kote kesyon kontwòl teritwa yo rete yon gwo defi pou otorite sekirite yo nan depatman Lwès la. Pandan fòs lòd yo ap chèche mete gwoup ame yo an retrè, popilasyon sivil la rete ekspoze ak danje ki mache ak operasyon militè ak echanj kout zam.

Rete pou konnen rezilta operasyon an. Atansyon rete fikse sou kapasite PNH la ak Task Fòs la pou reprann zòn ki anba kontwòl gwoup ame yo epi garanti sekirite abitan Gresye yo. Jiskaprezan, otorite konsène yo poko pibliye yon bilan ofisyèl sou entèvansyon an.

pascalfleuristil2018@gmail.com