Éditions Boréal mete fen nan kolaborasyon li ak Thélyson Orélien sou sispèk itilizasyon entèlijans atifisyèl nan ekriti woman li
Éditions Boréal mete fen nan kolaborasyon li ak ekriven ayisyen-kanadyen Thélyson Orélien apre nouvo enfòmasyon ki ta montre entèlijans atifisyèl te sèvi nan pwosesis ekriti woman li a, C’était ça ou mourir. Nan yon kominike li pibliye mèkredi 21 oktòb 2026 la, mezon edisyon an anonse li pap re-enprime liv la, ni pibliye lòt zèv otè a. Desizyon sa a relanse deba sou plas entèlijans atifisyèl nan kreyasyon literè ak nesesite pou gen transparans nan relasyon ant ekriven ak mezon edisyon.
Dapre sa Éditions Boréal fè konnen, nouvo enfòmasyon ki vin jwenn li nan dènye jou yo ta konfime itilizasyon entèlijans atifisyèl nan pwosesis ekriti woman an. Enfòmasyon sa yo parèt kontrè ak deklarasyon Thélyson Orélien te fè plizyè fwa bay mezon edisyon an, kote li te toujou soutni li pa t itilize entèlijans atifisyèl pou kreye liv la. Dezakò sa a vin tounen youn nan pwen santral nan dosye a, ki mete an kesyon konfyans ant otè a ak mezon edisyon ki te akonpaye travay li a.
Mezon edisyon an fè konnen li te anvizaje akonpaye ekriven an pou prepare yon dosye ki ta kapab ede klarifye sitiyasyon an, verifye enfòmasyon ki disponib yo epi detèmine si entèlijans atifisyèl te patisipe nan ekriti woman an. Sepandan, dapre Boréal, Thélyson Orélien pa t vle bay lòt eleman pou konplete demach sa a. Nan kondisyon sa yo, mezon edisyon an deside mete yon bout nan kolaborasyon an, san li pa prevwa okenn lòt piblikasyon ni nouvo enpresyon liv la.
Pi lwen pase konsekans desizyon sa a sou karyè Thélyson Orélien, dosye a poze yon kesyon enpòtan sou avni literati nan epòk entèlijans atifisyèl la. Pandan teknoloji sa a ap pran plis plas nan pwosesis kreyasyon an, transparans, konfyans ak respè pou travay otè yo rete pami pi gwo defi sektè liv la. Rès dosye a ap depann tou de kapasite diferan pati yo pou pote plis limyè sou sa ki te pase toutbon nan ekriti C’était ça ou mourir.
pascalfleuristil2018@gmail.com
