Ayiti : Nayib Bukele voye 100 sòlda espesyal pou chèche militè salvadoryen ki disparèt yo

Prezidan salvadoryen an, Nayib Bukele, ranfòse mwayen militè peyi li mete disponib pou ede jwenn kat sòlda salvadoryen ki disparèt ann Ayiti apre yon atak gang ame dimanch pase. Dapre jounal ameriken Miami Herald, 100 sòlda nan fòs espesyal Salvadò yo rive ann Ayiti jedi 22 oktòb la pou patisipe nan rechèch yo. Gen posiblite pou yon lòt gwoup 100 sòlda vin ranfòse premye kontenjan an nan Pòtoprens.

Dapre enfòmasyon jounal ameriken an rapòte, sòlda salvadoryen yo te pran nan yon atak gang ame dimanch pase nan zòn Santo, nan komin Kwadèboukè. Deplwaman nouvo fòs sa yo ta dwe kontribye nan rechèch pou jwenn militè ki disparèt yo. Yon sous ki pwòch operasyon an fè konnen deplwaman sa a se sèlman kòmansman an, pandan yon lòt sous fè konnen gen posiblite pou 100 lòt sòlda salvadoryen debake nan kapital ayisyen an.

Desizyon sa a montre enkyetid otorite salvadoryen yo genyen devan disparisyon militè yo, nan yon moman kote ensekirite gang ame yo kontinye reprezante yon gwo defi ann Ayiti. Sepandan, detay sou misyon sòlda espesyal sa yo, ansanm ak kondisyon kowòdinasyon yo ak otorite ayisyen yo, poko fin presize nan enfòmasyon ki disponib yo.

Pandan Salvadò ap ranfòse prezans militè li nan rechèch yo, kesyon prensipal la rete san repons: ki kote kat sòlda yo ye, e nan ki kondisyon otorite yo ap rive jwenn yo? Rezilta operasyon k ap dewoule yo pral detèmine pwochen etap otorite salvadoryen yo nan dosye sa a.

pascalfleuristil2018@gmail.com