Sibèatak : BRH mete enstitisyon finansye yo sou pinga, li entèdi tout negosyasyon ak pirat enfòmatik
Bank Repiblik Ayiti (BRH) lanse yon avètisman sou danje sibèatak yo reprezante pou sektè finansye ayisyen an. Nan yon avi li pibliye lendi 19 oktòb 2026, Bank Santral la mande enstitisyon finansye yo ranfòse dispozitif sekirite yo pou limite risk atak enfòmatik ki kapab mete lajan ak enfòmasyon pèsonèl kliyan yo an danje.
Youn nan dispozisyon BRH mete aksan sou yo se entèdiksyon pou nenpòt enstitisyon finansye antre nan negosyasyon ak pirat enfòmatik ki mande lajan kòm ranson apre yon atak. Bank Santral la fè konnen okenn bank oswa lòt enstitisyon finansye nan peyi a pa gen otorizasyon pou fè kalite antant sa yo. Pozisyon sa a antre nan kad mezi otorite monetè yo ap pran pou fè fas ak menas dijital yo.
Daprè BRH, pandan senk dènye ane yo, atak enfòmatik yo ogmante nan yon nivo ki poko janm rive konsa, ni sou plan mondyal ni nan rejyon an. Sitiyasyon sa a mete sistèm bankè ayisyen an devan gwo defi, sitou nan kesyon pwoteksyon done ak bon fonksyònman sèvis finansye yo. Se poutèt sa, Bank Santral la raple tout enstitisyon ki anba sipèvizyon li gen obligasyon pou respekte prensip sekirite ki tabli pou sistèm enfòmatik yo.
Depi ane 2023, BRH fè konnen li angaje plizyè inisyativ pou amelyore kapasite sistèm finansye a pou reziste devan menas sa yo. Efò sa yo konsantre sou modènizasyon enfrastrikti enfòmatik yo, fòmasyon pèsonèl la ak sansibilizasyon sou bon pratik sekirite dijital. An menm tan, enstitisyon an ensiste sou nesesite pou bank yo genyen plan ijans ki kapab aktive tousuit lè yon atak fèt, pandan yo dwe fè analiz teknik pou idantifye orijin atak la ak fason li dewoule.
Nan fen avi a, Bank Santral la mande enstitisyon finansye yo ansanm ak popilasyon an rete vijilan devan menas sibèkriminèl yo. Li reyafime responsablite li genyen pou kontwole aplikasyon mezi pwoteksyon yo, yon fason pou prezève byen kliyan yo, sekirize enfòmasyon pèsonèl yo epi garanti kontinite sèvis finansye yo nan peyi a.
