Michel Martelly ak plizyè kandida Debloke anonse depo pyès yo nan BED Lwès 1 an
Ansyen prezidan Michel Martelly, ansyen depite Almetis Junior Saint Fleur ak Samuel Joasil, ki pote tinon Samuel Kanapevè, se pami pèsonalite politik ki prevwa depoze pyès kandidati yo vandredi 23 oktòb 2026 la nan Biwo Elektoral Depatmantal (BED) Lwès 1, sou wout Frè yo. Dapre enfòmasyon ki disponib yo, aktivite sa a fikse pou anviwon 2è nan aprèmidi, nan kad anbisyon politik diferan kandida yo pou prezidans peyi a, Sena a ak meri Pòtoprens, pami lòt pòs elektif.
Dapre enfòmasyon ki sikile sou dosye a, Michel Martelly ta dwe antre nan kous pou prezidans lan, pandan Almetis Junior Saint Fleur ap vize yon plas nan Sena a. Samuel Joasil, alyas Samuel Kanapevè, bò kote pa l, ta dwe prezante kandidati li pou meri Pòtoprens. Plizyè lòt kandida ki asosye ak Debloke ta dwe akonpaye yo nan demach sa a. Depo pyès sa yo make yon etap nan preparasyon kandida yo, nan yon moman kote aktè politik yo ap chèche pozisyone tèt yo nan pwosesis elektoral la.
Retou Michel Martelly nan kous pou pi gwo fonksyon politik peyi a ta bay demach sa a yon dimansyon patikilye. Ansyen chantè a te eli prezidan Repiblik Ayiti an 2011, anvan li te pase senk ane sou pouvwa a, soti 2011 pou rive 2016. Si kandidati li a konfime epi li jwenn validasyon otorite elektoral yo, sa ta make yon nouvo etap nan karyè politik li. Sepandan, depo pyès kandidati pa vle di otomatikman yon kandida kalifye pou patisipe nan eleksyon yo.
Se desizyon Konsèy Elektoral la sou dosye chak kandida k ap pèmèt konnen kiyès ki satisfè kondisyon legal yo pou antre ofisyèlman nan kous elektoral la.
pascalfleuristil2018@gmail.com
