Ayiti : KEP fikse premye tou eleksyon yo pou 18 jiyè 2027, pandan ensekirite a kontinye ap bay kè sote
Konsèy Elektoral Pwovizwa (KEP) pibliye, mèkredi 28 oktòb 2026 la, yon nouvo kalandriye elektoral ki prevwa premye tou eleksyon prezidansyèl ak lejislatif yo pou 18 jiyè 2027. Daprè dokiman an, kanpay elektoral la ap demare 15 avril pou rive 17 jiyè 2027, alòske dezyèm tou eleksyon yo fikse pou 4 oktòb menm ane a. Se nan dat sa a tou eleksyon pou kolektivite teritoryal yo prevwa fèt.
Nouvo kalandriye sa a vini apre plizyè chanjman ki fèt nan dispozisyon legal ki dwe gide pwosesis elektoral la. Nan yon nòt pou laprès, KEP fè konnen desizyon sa a pran apre piblikasyon dekrè elektoral 6 oktòb 2026 la, ki revize dekrè 2 jen 2026 la, ki te deja sibi yon modifikasyon 2 jiyè. Enstitisyon elektoral la fè konnen ajisteman sa yo dwe pèmèt operasyon elektoral yo kontinye nan yon kad legal ki bay diferan aktè yo posiblite pou yo ranpli responsablite yo.
Anvan piblikasyon nouvo dat yo, KEP fè konnen li te chita pale ak plizyè sektè nan peyi a. Pami yo genyen responsab fòs sekirite yo, reprezantan pati politik yo, òganizasyon sosyete sivil la, sektè prive biznis la ansanm ak gouvènman an. Daprè enstitisyon an, konsiltasyon sa yo antre nan demach pou kreye kondisyon ki nesesè pou avanse ak preparasyon eleksyon yo, nan respè dispozisyon lalwa.
Sepandan, malgre nouvo dat sa yo, kesyon ensekirite a rete youn nan pi gwo obstak ki menase òganizasyon eleksyon yo an Ayiti. Gwoup gang ame yo kontinye ap fè lalwa nan plizyè zòn, sitou nan rejyon metwopolitèn Pòtoprens ak nan depatman Latibonit. Sitiyasyon sa a soulve anpil enkyetid sou kapasite otorite yo pou garanti sekirite elektè yo, kandida yo ak pèsonèl elektoral la. Li poze tou pwoblèm sou fason materyèl elektoral yo pral rive nan zòn kote gang yo toujou gen gwo enfliyans.
Pandan KEP ap travay pou respekte nouvo kalandriye li mete sou pye a, yon gwo kesyon rete san repons : èske eleksyon yo ap kapab fèt toutbon 18 jiyè 2027 la si gang ame yo kontinye kontwole plizyè pati nan peyi a ? Paske, fikse yon dat pa sifi pou garanti yon eleksyon. Pou popilasyon an kapab vote libelibè, san menas ni presyon, fòk otorite yo rive amelyore kondisyon sekirite yo. San yon chanjman reyèl sou teren an, nouvo kalandriye elektoral sa a riske rankontre menm difikilte ki te anpeche òganizasyon eleksyon yo pandan dènye ane yo.
