Dosye asasina Jovenel Moïse la: DCPJ ak Interpol arete avoka Phénil Gordon Désir

Me Phénil Gordon Désir, avoka epi responsab pati politik Ayiti 2054 la, tonbe anba men lapolis mèkredi 28 oktòb 2026 la, nan yon makèt nan Petyonvil. Se ajan Direksyon Santral Polis Jidisyè (DCPJ) ak Interpol ki mennen operasyon an. Non avoka a te deja sou lis moun otorite yo t ap chèche depi jiyè 2021 nan kad ankèt sou asasina ansyen prezidan Jovenel Moïse.

Arestasyon Phénil Gordon Désir la mete yon lòt fwa ankò dosye asasina ansyen chèf leta a nan sant atansyon piblik la. Dapre enfòmasyon ki disponib yo, otorite yo sispèk avoka a te kapab jwe yon wòl nan preparasyon konplo ki te abouti ak lanmò Jovenel Moïse nan rezidans prive li, nan Pèleren 5, nan lannuit 6 pou rive 7 jiyè 2021. Yo ta sispèk li tou dèske li te bay yon sipò lojistik nan kad operasyon sa a. Sepandan, se ak pwosedi jidisyè yo ki pou pèmèt otorite yo klarifye nivo responsablite li nan dosye a.

Apre entèpelasyon li, Me Phénil Gordon Désir ta plase an gadavi, pandan gen enfòmasyon ki fè konnen yon posib transfè li ale Ozetazini ta ka fèt anvan fen semèn nan. Jiskaprezan, enfòmasyon sa a bezwen konfimasyon ofisyèl bò kote otorite konsène yo. Posiblite transfè sa a soulve kesyon sou pwochen etap pwosedi jidisyè yo, sitou nan yon dosye ki gen plizyè aspè entènasyonal epi ki kontinye ap fè pale anpil depi plis pase senk lane.

Plis pase senk lane apre asasina Jovenel Moïse, arestasyon sa a raple nesesite pou ankèt la kontinye jiskaske tout limyè fèt sou zak la. Men, nan yon dosye ki gen gwo konsekans politik ak jidisyè, sispèk pa vle di koupab: se lajistis ki gen pou etabli reyalite yo, egzamine prèv yo.

pascalfleuristil2018@gmail.com