Bukele anonse deplwaman sòlda salvadoryen yo ann Ayiti prèske fini, li pwomèt bay gang yo yon leson

Prezidan salvadoryen an, Nayib Bukele, anonse deplwaman sòlda ak ekipman militè peyi li ann Ayiti prèske fini. Nan yon mesaj li pibliye an kreyòl ayisyen sou kont li sou rezo sosyal X, jedi 29 oktòb 2026 la, li ensiste sou objektif misyon an, ki se jwenn kat teknisyen avyasyon salvadoryen ki disparèt yo epi konbat gang ame yo.

Nan deklarasyon li an, chèf Leta salvadoryen an rejte lide ki ta fè kwè peyi li vin anvayi Ayiti oswa pran kontwòl resous li yo. Li prezante entèvansyon an kòm yon misyon sekou ak konba kont gwoup ame k ap simen laterè nan popilasyon an. Dapre Bukele, peyi li ap finanse anviwon 90% depans operasyon an, malgre kèk asistans lojistik li di li resevwa nan men lòt peyi. Li fè konnen eksperyans Salvadò te fè fas ak vyolans gang nan se youn nan rezon ki pouse l angaje l nan dosye sekirite Ayiti a. Li pran egzanp peyi li a, li prezante kòm youn nan teritwa ki pi an sekirite sou kontinan an, pou montre li kwè Ayiti kapab soti nan kriz sekirite li ap travèse a.

Pandan deplwaman an ap rive nan dènye etap li, Bukele mande pèp ayisyen an fè ekip li a konfyans, pandan li envite l priye Bondye pou peyi a jwenn gerizon. Li site yon pasaj nan Dezyèm Liv Kwonik la pou soutni mesaj espwa li a, epi li pwomèt sòlda salvadoryen yo ap retounen lakay yo lè misyon an fini. Sepandan, deklarasyon sa a pa bay yon dat presi pou fen deplwaman an ni detay sou rezilta operasyon ki deja fèt yo.

Pawòl prezidan salvadoryen an mete aksan sou volonte peyi li pou patisipe nan batay kont gang yo ann Ayiti. Kounye a, gwo defi a se konnen nan ki mezi prezans sòlda sa yo pral kontribye nan retabli sekirite, pwoteje popilasyon an epi pèmèt moun reprann lavi nòmal yo. Pou anpil Ayisyen k ap viv anba menas gwoup ame yo, se rezilta konkrè sou teren an k ap bay misyon sa a tout valè li.

pascalfleuristil2018@gmail.com