Nouvo rebondisman nan dosye asasina ansyen prezidan Jovenel Moïse
Gen yon nouvo devlopman nan dosye asasina ansyen prezidan Jovenel Moïse la. Lakou Dapèl Pòtoprens anile òdonans fèmti jij enstriksyon Walter Wesser Voltaire te rann nan nan kad ankèt sou lanmò ansyen chèf Leta a. Desizyon sa a relanse dosye a, ki te sanble fin pran fen aprè plizyè mwa ankèt ak anpil konfizyon nan sistèm jidisyè a.
Apre anilasyon òdonans lan, dosye a pase nan men yon nouvo jij enstriksyon, Denis Cyprien, ki resevwa misyon pou relanse ankèt la epi fè limyè sou tout zòn lonbraj ki toujou genyen nan dosye sa. Nominasyon nouvo jij sa a make yon etap enpòtan nan rechèch verite ak jistis pou ansyen prezidan an, ki te asasinen nan lannwit 6 pou rive 7 jiyè 2021 lakay li, nan Pèlerin 5.
An menm tan, Jij Emmanuel Lacroix lanse yon demann antant jidisyè entènasyonal ak otorite ameriken, kanadyen ak dominiken, pou yo ka tande temwayaj ak entèwogasyon kèk moun ki deja site nan dosye a. Pami yo, gen Martine Moïse, Joverlin Moïse, Léon Charles, Jomarlie Moïse, ansyen premye minis Ariel Henry, ansanm ak responsab konpayi sekirite CTU. Koperasyon sa a ta dwe ede sistèm jistis ayisyen an pwoche plis de verite sou youn nan pi gwo krim politik nan listwa resan peyi a.
