Gwo pann mondyal sou sèvis AWS Amazon lan lakoz gwo deranjman sou entènèt
Lendi 20 oktòb 2025 lan, Amazon fè konnen gen yon gwo pann teknik ki frape sèvis enfòmatik li yo nan divizyon Amazon Web Services (AWS). Pann sa a lakoz anpil pwoblèm sou plizyè sit ak aplikasyon popilè atravè mond lan, tankou Alexa, Snapchat, Robinhood, ansanm ak jwèt videyo Fortnite. Itilizatè yo te plenyen an mas sou rezo sosyal yo akoz difikilte pou jwenn aksè ak sèvis sa yo.
Nan yon kominike, Amazon eksplike zòn US-EAST-1, youn nan pi gwo sant done li yo, ap fè fas ak gwo ralantisman ak erè teknik. Plizyè lòt platfòm, tankou konpayi entèlijans atifisyèl Perplexity ak echanj kriptomonnen Coinbase, konfime yo menm tou yo afekte pa pann sa a.
Prezidan aplikasyon mesaj Signal, Meredith Whittaker, fè konnen sou rezo X sèvis yo pa mache nòmalman akoz pwoblèm AWS la. Sitiyasyon sa montre kijan anpil sèvis sou entènèt depann anpil sou enfrastrikti Amazon lan pou fonksyone chak jou.
AWS gen gwo sant done atravè plizyè peyi, epi li bay sèvis pou estokaj enfòmasyon, kapasite kalkil, ak lòt zouti dijital pou antrepriz, leta ak moun endividyèl. Pann sa a montre klèman danje ak konsekans yon entèwipsyon teknik konsa kapab genyen sou ekonomi dijital ak kominikasyon mondyal la.
