Retou jèn Andrew Ashton Milord an Ayiti apre plizyè mwa an Ejip
Ministè Zafè Etranjè ak Relijyon (MAEC) fè konnen jèn Andrew Ashton Milord, yon ti gason 11 an, tounen an Ayiti vandredi 24 oktòb 2025. Ti gason an te vin fè anpil pale nan mwa avril pase a apre li te lanse yon apèl sou rezo sosyal yo depi an Ejip, apre lanmò manman li.
Daprè MAEC, otorite yo te rive idantifye jèn Andrew rapidman epi mete l anba swen konsilè Ayiti an Ejip. Gras ak kolaborasyon ant misyon diplomatik ak biwo konsilè Ayiti nan Lafrik ak nan Karayib la, yo te kapab òganize retou li san pwoblèm nan peyi a.
Lè li rive an Ayiti, plizyè enstitisyon leta te pran swen li. Pami yo, gen Ministè Touris la, IBESR (Enstiti Byen-Èt Sosyal ak Rechèch), Brigad Pwoteksyon Minè (BPM) ak Majistra vil Okap la. Yo te travay ansanm pou asire yon bon akèy ak bon swivi pou ti gason an kapab rekòmanse lavi l ak trankilite.
